設定適當嘅要求，就係成功嘅一半 俗語話：小心問個天俾乜嘢你；聯署行動亦一樣。你嘅聯署行動定咗乜嘢要求， 係成功嘅關鍵 — 要求定得適當，容易成功；定得唔適當，就會變得好難。以下係一啲簡單貼士，幫你決定聯署要求啲乜嘢。 選定一個解決問題嘅方法 同一個問題，有好多唔同嘅解決方法。例如阻止企業公司影響政客，可以要求立法限制選舉捐獻，要求候選人自願拒絕捐獻，又可以要求企業停止捐獻。 你首先需要考慮各種解決問題嘅方法，然後選擇最好嘅一個 — 一般嚟講，就係你做最少嘢，就可以達到目的嗰個方法。 要具體 一個好嘅目標，需要清晰、具體、可以量化； 如果你唔講清楚要求乜嘢，對方就好容易表面扮合作，但係你要求嘅嘢，佢其實乜都冇做，你亦好難知道你到底算唔算達到目的。 例如你要求政府規定最低工資，但係冇講清楚數目係幾多，如果政府決定加10%，你可能決定唔到夠唔夠，行動算唔算成功。 設定可以達到嘅要求 你要求嘅，應該係喺現實可以實行嘅事；而且你向佢發出聯署要求嘅對象，亦有權力做到。 例如一間學校嘅校長唔能夠改變法例，但點樣喺學校裏面執行有關法例，就喺佢權力範圍之內。 知道事實 你唔需要將所有細節公開，但如果你對要求嘅嘢有認識，會對你嘅聯署行動非常有幫助。例如：有啲條例已經存在，如果你唔知道，就可能會嘥好多時間，要求制訂一啲已經存在、但係冇人執行嘅法例。你可能需要問：其他地方有冇相同嘅條例？點解你嘅行動對象一直冇執行？你期望佢對你嘅聯署行動會有乜嘢反應？
