×
同全世界分享你個聯署行動
網上聯署行動，其中一個好處，係可以立即廣傳，非常容易 — 話俾越多人知，就越多人會簽。以下係一啲最有效嘅方法，廣傳你嘅聯署行動。你嘅朋友重複見到你個聯署越多次，就越有可能行動，所以不妨多管齊下，唔一定只用你最鍾意嘅方法。
電郵最幫到手
電郵係邀請人參加聯署最重要嘅方法，亦係Avaaz成功嘅核心 — 過去幾年，最多人聯署嘅情況，就係收到自己識嘅人發嘅電郵。 電郵幫你聯絡其他人，清楚講明件事，唔受140個字數限制。如果你啱啱做𡁵一個聯署行動，點擊呢度，用我哋嘅撰寫電郵指引，寫個贏面高嘅電郵，廣傳俾你所有認識嘅人。
喺社交網絡廣傳
喺面書或者推特發貼文，可能係最容易嘅方法，向你認識嘅人廣傳你嘅聯署行動。 如果你發推特 — 記得用盡所有標示，令你嘅對象睇到你嘅信息；唔好忘記利用所有熱門 hashtag # 號，令關心同樣問題嘅人，睇到你嘅貼文。仲有，請比你多十倍跟隨者嘅朋友幫忙，幫你轉發。
參與網上討論
要放資料上網，有好多方法：可以放上自己博客，或者請其他博主俾你喺佢度發博文 — 博客可以放好多細節資料，甚至比電郵更多，因為讀你篇博文嘅人，都係特登搵你篇文嚟睇， 所以可以放手寫得個人化一啲，加連接、圖表、提示鐘仔、提示哨子。 你可能係某啲組織嘅會員，或者可以將你嘅聯署行動放上佢哋網站。 如果見到同你個聯署嘅議題相關嘅新聞，考慮喺佢內文下面討論部份，貼上你個聯署嘅連結 — 俾讀者點擊入去，亦俾寫呢篇新聞嘅記者知道你個聯署行動。
蛇王有着數
我哋人人都試過 — 碌吓睇聊天室啲朋友，睇吓大家講緊乜嘢。無論係Skype、 Gchat、 AIM，或者其他通訊工具，喺你嘅狀態一欄，貼一條連結或者個人信息，等你嗰啲無所事事碌電話嘅朋友做件好事。
搵關注相似議題嘅平台同通訊錄
推廣你嘅聯署行動其中一個困難，就係要搵到對同樣議題熱心嘅人。利用已經建立關注相似議題嘅平台，就唔使由零做起。 你有冇收過群發電郵，收件人可能都係志趣相投（某組織成員、體育隊、專業聯盟等等）。睇吓專題群發電郵軟件listserve，搵吓有冇同你個議題有關嘅通訊錄；集中討論某啲題目嘅網上平台或者網站，都好有用。你可能唔認識收件名單上所有人，呢個反而係好處 — 幫你接觸到唔識嘅人，佢哋對你關心嘅議題有興趣，呢個就係關鍵，令你嘅聯署行動得以壯大。
... 當然仲要 ...
聚焦你嘅聯署行動！
大家都明白，一個好嘅諗法，自然會受到注意；要吸引到大量聯署，最好嘅方法，就係件事本身夠勁。你將一個設計得好勁嘅聯署行動發佈出去嗰一刻，當然重要，但真正能夠將行動推廣出去，更重要嘅，係令你唔識嘅人，都幫你用佢哋自己嘅網絡轉發。醒目嘅標題、吸引嘅推特、震撼性嘅圖片，都會令更多人轉發。不過，一開始未收集簽名之前，未必需要因為成個行動設計未達完美而唔展開住；反而係展開之後，隨時要準備改善策略。